Аҧсуа
  Д.Гәлиа диижьҭеи 142 шықәса аҵра иазкны. 01.04.2016

Д.Гәлиа диижьҭеи 142 шықәса аҵра иазкны.

Иҵит 142 шықәса Дырмит ду диижьҭеи. Аҧсуаа ааигәатәи ҳаиҭаҿиара, ҳамцаҧшаара, аҩыра иадҳәалоу ҳаамҭа ҿыц, ҳсахьаркыратә литература аира иахьагьы уаҵәгьы Дырмит Гәлиа ихьӡ иадҳәалоуп. Дыҟам уи иеиҧш абри аамҭа, абарҭ ахҭысқәа иргәыласоу, иара иеиҧш урҭ иргәылыҳәҳәо даҽаӡәы, даҽа аҧсыуак. Уи дышқәыҧшӡаз иеиликааит аҩыра, асахьаркыратә литература рымч, рҵакы, жәлар рыҧсҭазаараҿ иааныркыло аҭыҧ,  рынарха, рымамзаарагьы амилаҭ азы ишырӡгоу,  рыҟамзаарак ишаҩызоу.1912 шықәсазы иҭыҵыз, ҳлитература ашьапы зкыз раҧхьаӡатәи иажәеинраалақәа реизга алагамҭаҿ  Д.Гәлиа иргылт  жәлар ражәаҧҟа: “Аҽы ҧсыр адәы аҭынхоит, ауаҩы дыҧсыр ажәа иҭынхоит”. Абри мацара иаҳәоит уи иҵаулара, ихаранаҧшра, ихы ззикран иҟаз аус ҳауаажәлар ҽаҧара ҧхьаҟа изгоз ак акәны дшахәаҧшуаз.

    Еиҿыхарала, уаҕеимшхарала иҭәыз иаамҭақәа раан маҷ-маҷ, шьаҿа-шьаҿа, ааӡабла уи илшеит ҳсахьаркрыратә литература ашьаҭа акра,  апоезиаҿ аума, апрозаҿ аума, атеатр азы аума ҧсра зқәым аҩымҭақәа раҧҵара.

   Дырмит ду иаҧшьигаз, илиршаз, иаамҭеи иареи реизыҟазаашьа – ари аҧсыуак дыҟанаҵ ихахьы иааигалаша, дзызхәыцлаша, гәадурала дызлацәажәалаша ак ауп.

Аредактор хада – Аҧсны жәлар рпоет Мушьни Лашәриа.



  Дырмит Гәлиа иахь

                                    Баграт Шьынқәба

Ируҭеит аҧсуаа агәырҕьашәа,

Инагӡаны иуҳәеит уҿахәы,

Ерцахә ду хызҩо асы акәушәа

Иӡышӡа ишлеит ухахәы...



Уашәақәа икьаҭо цәымзаӡам,

Уашәақәа мроуп иҧхауа,

Апоет дызражәуа мчыҟаӡам –

Шәышықәса царгьы иҭакәкәа!...

                                1948 ш.



                      Ажәа саҳәоит

                                  Иван Ҭарба

...Ацәмаа зкызгьы, ирашәозгьы –

Адгьыл рышьҭа анхаломызт,

Хатә бызшәала ак зҿашәозгьы

Иажәа бҕьыцк ианшәаломызт...



Сшьамхнышгыла игәыдыскылоит

Адгьыл, убла зырлашаз,

Амцаҧшаара иадыскылоит

Аҧсуаа рзыҳәа иулуршаз!...

                             1964ш.

Икьыҧхьуп алитературатә газеҭ “Еҵәаџьаа” аҿы №19, ианар-март 2016 ш.


Возврат к списку