Аҧсуа
«Амузеи аҵх”  -   Д.Гәлиа  илитературатә-мемориалтә музеи аҿы 25.05.2016

«Амузеи аҵх” - Д.Гәлиа илитературатә-мемориалтә музеи аҿы

Лаҵара 18,  Жәларбжьаратәи Амузеи  Амш азы  адунеи атәылақәа акырџьара  имҩаҧыргоит “Амузеиқәа рыҵх” зыхьӡу акциа.  Сынтәа уи акциа   раҧхьаӡа акәны  имҩаҧысит  Дырмит Гәлиа  илитературатә-мемориалтә музеи аҿы.
        Лаҵара 18, ахашаҽны,  аҧсуа литература ашьаҭаркҩы, апатриарх  Иҩны-амузеи аҭааҩцәа рзы  ашәқәа аартын  асааҭ 10.00 инаркны 24.00 рҟынӡа.  Ахәылбыҽха асааҭ  18.00 инаркны ихацыркын  ҷыдала  ари акциа иазкны еиҿкааз  апрограмма.   Раҧхьаӡа амузеи иаҭааз иреиуоуп Ҭырқәтәылантәи зыҧсадгьыл ашҟа нхара ихынҳәыз ҳџьынџьуаа рхаҭарнакцәа.  Анаҩс  Д.Гәлиа иҩны-амузеи ҩындырҭәааит  Б.Шьынқәба ихьӡ зху  Аҟәатәи Актәи абжьаратәи ашкол аҵаҩцәеи арҵаҩцәеи.  Иара убас Аҟәатәи акультуратә ҵараиурҭа аҵаҩцәа гәыҧҩыки.  Урҭ рзы ҷыдала  аеқскурсиа  мҩаҧылгеит амузеи аусзуҩы Елла Ҭаниа-ҧҳа. Аеқскурсиа ашьҭахь амузеи акттә  Зал аҿы еизаз ахәаҧшцәа  рҿаҧхьа иқәгылеит   ашколхәыҷқәа, амузыкарҳәаҩцәа қәыҧшцәа.  Ари ахәылбаҽхазы амузеи аҿы аамҭакала имҩаҧысуан еиуеиҧшым аусмҩаҧгатәқәа. Азал аҿы гәыҧҩык аҭааҩцәа аконцерт иахәаҧшуан, даҽа гәыҧк аеқскурсиа рзымҩаҧыргон, даҽа џьоукгьы азҿлымҳара аҭаны ҷыдала “Амузеи аҵх” азы аусзуҩцәа еиҿыркааз - “Амузеи асасцәа дахьқәа” зыхьӡу ҷыдалатәи ацәыргақәҵа иахәаҧшуан.  Амузеи аныҳәазтәи апрограмма иагәыцәны иҟалеит Михаил Алхазов напхгара зиҭо аквартет “Каприччио” ақәгылара. Амузеи иаҭааз гәахәара дула иазыӡырҩит апрофессионалцәа инарыгӡоз   аклассикатә музыка.  Аҭааҩцәа иргәаҧхеит  Аҟәатәи алицеи-интернат аҵаҩцәа иаздырхиаз амузыкатә программагьы.  Амузеи  имҩаҧнагаз акциа активла рҽаладырхәит Аҧснытәи аҳәынҭқарратә университет афилологиатә факультет астудентцәеи арҵаҩратә еилазаареи.  Аинтерес аҵан аҧсуа поетцәа ҿарацәа рықәгыларақәагьы.
    Аныҳәа ашыкьымҭазы Д.Гәлиа иҩны-амузеи иаҭааит Аҧсны Ахада Рауль Ҳаџьымбеи, аҧыза-министр Артур Амқәаби, акультура аминистр Ельвира Арсалиаҧҳаи, Жәлар реизара адепутатцәа гәыҧҩыки иара убас  ҳтәыла анапхгара рхаҭарнакцәеи. Урҭ рзы ҷыдала  имҩаҧган амузеи аҩныҵҟа аеқскурсиа.  Амузеи аусзуҩцәа атәыла Ахада иарҳәеит иахьазы   ргәы змырҭынчуа проблема хадас ирымоу аҩны-амузеи ахыбра аҭагылазаашьа шакәу.   Аҧсны Ахада Рауль Ҳаџьымба уи дазааҭгыло, иазгәеиҭеит ахыбра шьаҭанкыла аиҭарҿыцра шаҭаху, ажәагьы риҭеит уи иааиуа ашықәс азы нап шадыркуа.  Анаҩс асасцәа дахьқәа рҽаладырхәит акттә зал аҿы имҩаҧысуаз аҿарацәа рықәгыларақәа -  гәахәарала ирзыӡырҩит апоетцәа қәыҧшцәа ражәеинраала ҿыцқәа.
Д.Гәлиа иҩны-амузеи аҿы  “Амузеи аҵх” иазкыз аусмҩаҧгатәқәа цон аҵх акыр инаскьаанӡа – 24.00 сааҭ рзгьы амузеи иаҭааз гәыҧҩык асасцәа рзы имҩаҧган  аеқскурсиа,  уи аамҭазы акттә Зал аҿы еизаз асасцәа рҟазара ддырбон амузыкарҳәаҩы, актиор Џьамбул Жорданиеи гәыҧҩык агитара арҳәаҩцәа қәыҧшцәеи. Асасцәагьы аҧшәмацәагьы ҳәарада агәахәара ду рнаҭон амузеи аҩныҵҟа зегьы зырҧхоз, изырлашоз арҿиаратә ҳауа зҩыда, агәалаҟазаара ссир.    

Возврат к списку