Аҧсуа
Жьҭаара 4, 2016 шықәсазы Дырмит Гәлиа илитература-мемориалтә музеи аҿы имҩаҧган  Аҧсны аџьынџьтәылатә еибашьраҿы Аиааира 23 шықәса аҵра иазкыз ахәылҧаз. 04.10.2016

Жьҭаара 4, 2016 шықәсазы Дырмит Гәлиа илитература-мемориалтә музеи аҿы имҩаҧган Аҧсны аџьынџьтәылатә еибашьраҿы Аиааира 23 шықәса аҵра иазкыз ахәылҧаз.

Аҧсны аџьынџьтәылатә еибашьраҿы Аиааира 23 шықәса аҵра иазкыз ахәылҧаз рҽаладырхәит аибашьра аветеранцәа – еицырдыруа ашәҟәыҩҩцәа, асахьаҭыхыҩцәа, артистцәа, иара убасгьы амузыкатә фильм “Ҳара ҳаруаа реиҳабы” аҭыхратә гәыҧ ахаҭарнакцәа - уи автор, еицырдыруа аҧсуа журналист Емма Хәаџьаа днараҧхьагыланы. Х-хәҭак рыла еиҿкаау, аибашьраан ииз, ирҳәоз ашәақәа ҳаамҭазы аус адуланы иаҧҵоу ари афильм Аҧсны ахәаҧшцәа ирылаҵәахьеит, бзиа еицырбахьеит.
Аиқәшәара рҽаладырхәит Аҟәатәи абжьаратә школқәа ҩба – Б.Шьынқәба ихьӡ зху актәии Д.Гәлиа ихьӡ зху аҧшьбатәии рҵаҩцәеи рырҵаҩцәеи. Ашколхәыҷқәа еизаз ирзаҧхьеит аҧсадгьыли уи ахьчаразы зхы зымшаҭоз афырхацәеи ирызкыз ажәеинраалақәа. Аибашьратә хҭысқәа зыблала избаз, уи иахҟьаны агәаҟрақәа рацәаны изхызгаз еицырдыруа аҧсуа шәҟәыҩҩы Џьума Аҳәбеи, Аҧсны афырхаҵа Мзиа Беиаҧҳаи уҳәа аибашьра аветеранцәа ргәалашәарақәа рыцеиҩыршеит ахәылҧаз зҽалазырхәыз.
Амузыкатә фильм “Ҳара ҳаруаа реиҳабы” автор Емма Ҳәаџьаа аҿар ирзеиҭалҳәеит ари афильм аидеиа шцәырҵыз, аҭыхрақәа шымҩаҧысуаз, уи хықәкы хадас ишамоу аибашьраа аан аҭабиақәа рҿы ииз ахаҵара ашәақәа ҳаамҭазтәи абжьы рхаҵаны реиқәырхара, урҭ абиҧара реимадара иацхраауа рыҟаҵара. Анаҩс ахәылбыҽха иалахәыз идырбан амузыкатә фильм “Ҳара ҳаруаа реиҳабы” аҵыхәтәантәи – ахҧатәи ахәҭа. Уи раҧхьаӡа акәны аӡыргара азун ҳаҳҭны қалақь Аҟәа ахы ианақәиҭтәыз амш – цәыббра 27 рзы.
Иара убасгьы ари ахәылҧаз инақәыршәаны, Д.Гәлиа иҩны-амузеи аҿы еиҿкаан Аиааира 23 шықәса ахыҵра иазкыз афотоцәыргақәҵа.

АФОТОГАЛЕРЕА

Возврат к списку